पुस ११,काठमाडौँ ।

पहिला सरकार बनाएपछि पार्टी एकता गर्ने एमालेको प्रस्तावले माओवादी केन्द्र झस्किएको छ ।मंगलबार बिहान विराटनगरमा बिनाविभागीय मन्त्री एवं नेकपा (माओवादी केन्द्र) का नेता गिरिराजमणि पोखरेलले सरकार गठन हुनुभन्दा पहिले पार्टी एकता हुनुपर्ने बताए । मंगलबार नै काठमाडौंमा एक कार्यक्रममा बोल्दै नेकपा एमालेका नेता लालबाबु पण्डितले सरकार गठन भएपछि मात्र एमाले र माओवादी केन्द्रबीच एकीकरण हुने बताए ।
निर्वाचनअघि पार्टी एकताको लक्ष्यसहित वाम गठबन्धन बनाएर चुनावमा होमिएका नेताहरुको फरक भनाईले एमाले र माओवादी केन्द्रबीच बढ्दो दूरीलाई स्पष्ट बनाउँछ । यसले वाम गठबन्धन नेताहरुले समयको आवश्यकता महसुस गरेर रुपान्तरणसहित बनाएका होइनन् भन्ने पनि पुष्टि गर्दछ । दुवै पार्टीले पार्टी र सरकारभित्रको महत्वपूर्ण पद बार्गेनिङ गर्न सरकार पहिला कि एकता भन्ने बहसलाई अगाडि ल्याएको बुझ्न सकिन्छ ।
सरकार बनिसकेपछि पार्टी भित्रको महत्वपूर्ण पद खासगरी एकीकृत पार्टीको अध्यक्ष एमालेले नदिने र यसअघि भएको सम्झौताअनुसार आलोपालो प्रधानमन्त्री पनि एमालेले नमानेर आफूलाई लतारेर लैजाने आशंका माओवादी केन्द्रभित्र छ ।
सरकार बन्नुअगाडि नै एकता गर्दा प्रधानमन्त्रीको लागि पार्र्टी अध्यक्ष नै छाड्नुपर्ने र खासगरी माधव, झलनाथ र वामदेव गौतम पनि प्रचण्डको कित्तामा गएर आफूलाई संसदीय दलको नेताबाटै प्रचण्डले हराइदिने हो कि भन्ने ओली पक्षको डर रहेको बालकोट स्रोतले बताएको छ ।
सरकारले पठाएको विधेयक शितलनिवासमा अड्किएको बहाना बनाए पनि वाम गठबन्धन पद बाँडफाँडमा भागबण्डा नमिल्दा आफैंमा अलमलिएको देखिन्छ ।