एजेन्सी । नेपाली लेग स्पिनर सन्दीप लामिछाने सम्मिलित मेलबर्न स्टार्सले बिग बास लिग (बीबीएल) क्रिकेटमा लगातार दोस्रो हार व्यहोरेको छ । बुधबार भएको खेलमा मेलबर्न एडिलेड स्ट्राइकर्ससँग पराजित भएको हो ।

एडिलेडको घरेलु मैदानमा भएको खेलमा प्रतियोगिताको बलियो टोलीको रुपमा रहेको मेलबर्न ११ रनले पराजित भएको हो । एडिलेडले दिएको १६३ रनको लक्ष्य पछा्एको मेलबर्नले निर्धारित २० ओभरमा ८ विकेट गुमाएर १५१ रन बनायो ।
यसअघि घरेलु मैदानमा टस हारेर पहिले ब्याटिङ गरेको एडिलेडले निर्धारित २० ओभरमा ४ विकेट गुमाएर १६२ बनाएको थियो । आजको खेलमा ३ ओभर बलिङ गरेका सन्दीपले २४ रन खर्चेका थिए ।

प्रतियोगिताको १३ खेल खेलेको मेलबर्न १० खेलमा जित र तीन खेलमा हारसँगै तालिकाको शीर्ष स्थानमा छ । मेलबर्नको २० अंक छ । जित निकालेको एडिलेड १२ खेलमा ७ जित ४ हार सहित १५ अंक जोडेर तालिकाको दोस्रो स्थानमा छ ।

यस सिजन उत्कृष्ट प्रदर्शन गरिरहेका सन्दीपले १२ खेलमा १४ विकेट हात पारिसकेका छन् ।