काठमाडौँ– प्रहरीले काठमाडौँको गौशाला र कोटेश्वरको यातायात काउण्टरबाट बढी भाडा असुलेको आरोपमा ३ जनालाई पक्राउ गरेको छ ।

महानगरीय ट्राफिक प्रहरी महाशाखका अनुसार कोटेश्वरबाट धनुषा घर भएका कृष्ण देवकोटा र झापा घर भएका खड्गबहादुर भण्डारीलाई पक्राउ गरिएको छ भने गौशालास्थित यातायात काउण्टरबाट दोलखाको सिंगटी घर भएका ३४ वर्षीय राम सुरेललाई पक्राउ गरिएको छ ।

महानगरीय ट्राफिक प्रहरी महाशाखाका प्रमुख एसएसपी जनक भट्टराईका अनुसार उपत्यकामा निषेधाज्ञा लागू भएपछि उपत्यका छाड्न खोज्ने यात्रुसँग उनीहरुले चर्को भाडा असुलेका थिए ।

शुक्रवार पक्राउ परेका दुई जनाले बसमा झापा र मोरङ जान चाहने यात्रुसँग ३ हजारदेखि ४ हजार ५ सय असुलेको प्रहरीको दाबी छ ।